قصيدة حب فى عيد الحب لأصل الحب

زجل تأليفى بمناسبه عيد الحب ألقيته فى القناة السابعة فى حوار فى عيد الحب:

تعالوا معايا فى عيد الحب
نشوف سوى احلى كلام م القلب
نعرف نوع جديد م الحب
نحب ناس هما نفسهم الحب
الحب مش كلمه وشويه اغانى
الحب ده احساس مليان بالمعانى
ياللى مش عايز يكون حبك معاق
تعالى وجرب تحب انسان معاق
حب ناس مابتعرفش غير الحب
ناس مابتفهمش غير لغه القلب
يمكن مابيعرفوش يتكلموا لغات
وعمرهم فى يوم ماخدوا شهادات
وماتعلموش م العالم كلمه هات
بس سبقوا ناس كتير فى نقاوه القلب والبركات
يمكن فى نظر المجتمع ناس مالهمش لزمه
يمكن عاله على ناس كتيره وعاملين ازمه
لكن دول رساله من ربنا للبشر
علامه حب رغم الشر اللى انتشر
يلا... فى عيد الحب قوم هات ورده وابتسامه
قدمها لمعاق وتكون لحبك ليه علامه
طبطب عليه وقوله هحقق لك مطلبك
اذا كان اللى خلقك حبك . انا مين عشان ارفضك؟
وشكرا للقناه السابعه والعاملين فيها
انا جيت انهارده بلسان كل المعاقين بعيد الحب اهنيها