حج درنكة 2011

الحكاية ابتدت من أول زيارة في عام 1971 للورد⁽¹⁾ لتجمع يشمل أشخاص معاقين وذويهم وشباب ومن هنا اتولدت إيمان ونور من صرخه أهل مرفوضين من المجتمع بسبب أبنائهم المعاقين.

وعند مغاره العدرا مريم كانت البداية ... بداية إيمان ونور

جان فانييه وماري إيلين ماتيو

وأول من أسسها طبعاً عارفينه جان فانييه ومارى إيلين ماتيو.

وانتشرت وكبرت إيمان ونور فى العالم كله بعمل الروح القدس وكل عشر سنين كان مندوبين من كل العالم بيتجمعوا فى نفس المكان في لورد اللى اتولدت فيه إيمان ونور عشان يحتفلوا سوا. اتجمعوا عام 1981 وكمان 1991 وعام 2001. كانت مصر مشاركة بعدد 75 شخص. وكبرت وكبرت إيمان ونور والبذرة بقت شجرة كبيرة وعشان الفرحه تعم الكل، كل بلد هتحتفل في مكانها بالمناسبة الحلوه ده وهو مرور 40 عام على ميلاد إيمان ونور. وعشان عددنا كبر خالص هتكون الاحتفالات لمدة عامين 2011 و2012 في كل ناحية فى العالم. أصل الفرحة دي ماتكفهاش سنة واحدة.

وإحنا في مصر هنحتفل سوا مقاطعة شمال مصر والسودان مع مقاطعة جنوب مصر والكويت.

وهندعى كمان أشخاص من مقاطعات تانية من لبنان وسوريا يشاركونا فرحتنا.

وعشان كده كوننا لجنة تحضير للاحتفال ده وسمناها فريق "القلب الفرحان". أصل شعار كل احتفالات الحج فى العالم كله هو "رسل فرح" ودول أعضاء اللجنة:

والمسئول عن الحج هو أمجد إدوارد وتساعده سحر رفعت.

وطبعا كل العمل ده تحت رعايه وتوجيه الآباء مرشدين المقاطعات: الأب / عادل زكا و الأب / بولس نصيف

يلا نصلى للعمل العظيم ده والتجمع الهايل اللى هيكون فيه حوالى 1000 شخص فى درنكة(2) من يوم الجمعة 4 فبراير 2011 إلى الاثنين 7 فبراير 2011.
 
وتابعونا هتعرفوا أخبارنا، لأن الحب هو اللي بيجمعنا .. شاركونا باقتراحاتكم وكمان صلوا لنا